-Со петтиот пакет економски мерки, за справување со ковид кризата, Владата како погодена група на граѓани ги вклучи и производителите на тутун. Со најновиот пакет предвидени се околу 5 милиони евра средства наменети за тутунарите, вели министерот за земјоделство, Арјанит Хоџа, во интервју за agrotim.mk.
Тој додава дека неговите лични заложби, и заложбите на Министерство за земјоделство, се во насока на решавање на сите проблеми на тутунопроизводителите. Заложбите ќе продолжат се додека не се откупи „и последната бала со тутун“.
Според министерот Хоџа, програмите за директни плаќања и рурален развој се донесени, а исплатите на основните субвенции ќе започнат набрзо.
-Први пари ќе добијат лозарите, а до април ќе се исплатат субвенциите за тутунот, потоа за поледелство, градинарство и овоштарство. Исто така во овој период ќе започне исплата и на апликантите кои добиле по мерките објавени од лани, а новите повици за „Млад земјоделец“ во висина од 20 000 евра неповратни средства, за 10 000 евра за нов агробизнис, „рурална жена“ и други мерки од програмата за рурален развој,се очекува да бидат на средина на годината. Ме радува тоа што има голем интерес токму за овие мерки кои се однесуваат на подмладување на секторот, што е исто така и европски тренд, вели меѓу другото министерот Хоџа, во интервјуто за agrotim.mk.
