Крушевскиот Младински културен центар, со мултимедијална намена доби донација во опрема, мебел и канцелариски материјал од Државна лотарија на Македонија. Според информациите од градоначалникот на Крушево, Томе Христоски, иако овој мебел е употребуван 2-3 години, тој сепак е во одлична состојба. Според тоа ќе им се даде на располагање на граѓанските организации што ќе функционираат во објектот, на учениците од ООУ „Никола Карев“, на здруженијата на лица со посебни потреби, на администрацијата, впрочем секаде каде што има потреба.
-Мултимедијалниот културен центар го градиме со пари од ИПА фондовите на ЕУ, во тек е проектот во вредност од 300.000 евра. Околу 27.000 евра е донацијата за кино проекција добиена од УНДП, која што ќе биде на располагање и на театарските уметници како дополнителни аудио ефекти во претставите. А, голема благодарност на Државна лотарија на Македонија за донацијата во вредност од 988,904 денари, која што ќе се користи за полесно одвивање на општествено важни процеси во општината, вели градоначалникот Христоски.
Старата училишна зграда во која што треба да функционира мултимедијалниот центар во Крушево, беше со децении оставена на забот на времето. И поранешните власти се носеа со идеја, да го реконструираат објектот. Но, сепак оваа идеја практично се реализира со заложбите на оваа локална власт и градоначалникот Христоски. Крушево на овој начин ги јакне капацитетите и потенцијалите за културна анимација на младите и сестран културен развој на градот, којшто е познат туристички и центар.
