Поради судир на интереси, Ристо Чулаковски е разрешен од членство во Управен одбор на студентскиот дом „Кочо Рацин“ во Битола. Ова го соопшти кабинетот на Љупчо Николовски, заменик на претседателот на Владата, задолжен за борба против корупција и криминал, одржлив развој и човечки ресурси, постапувајќи по иницијатива од Државната комисија за спречување на корупција (ДКСК).
-На денешната владина седница по доставена иницијатива од ДКСК, а разгледана и постапено од страна на кабинетот на ЗПВ Љупчо Николовски, Владата донесе одлука за разрешување на службеното лице Ристо Чулаковски ,член на Управниот одбор – претставник на основачот на Државниот студентски дом „Кочо Рацин“, Битола. Чулаковски е разрешен поради постоење на судир на интереси, соопшти кабинетот на Николовски.
Од формирањето на новата Влада, секоја пристигната иницијатива од ДКСК до Владата, внимателно и детално се разгледува и се постапува по нив. Борбата против корупцијата и криминалот, е меѓу клучните приоритети во владината рамка „Акција 21 – европски стандарди дома“, поточно втор по ред приоритет за оваа 2021 година, и во целиот процес е најважна соработката со сите надлежните антикорупциски институции, со независните тела, невладиниот сектор, бизнис заедницата.
-Владата покажува комплетна насоченост и почитување кон сите независни тела во државата, а пред се кон Државната комисија за спречување корупција, како една од клучните институции во откривањето и спречувањето корупција, стои во соопштението.
