Општина Прилеп во соработка со граѓанската организација Целим од Милано (Centro Laici Italiani per le Missioni) и Ромски ресурсен центар, со заеднички заложби во текот на 3 години ќе го реализираат проектот „Обезбедување пристојни услови за живот на ромските семејства во Општина Прилеп-СДЛР“, финансиран со европски пари, во вредност од околу 900.000 евра.
Градоначалникот на Прилеп, Илија Јованоски и претставници на граѓанските организации, остварија работна средба во Општина Прилеп, со што е означен и почетокот на реализацијата на проектот. Целта на овој проект е да се подобрат условите за живот на граѓаните од ромска националност кои што живеат во тешки услови во населбата „Тризла“.
-На средбата се разговараше за предлог акцискиот план за првите шест месеци од реализацијата на проектот и се разменија мислења за динамиката на реализација на предвидените активности. Во првата фаза од реализацијата на проектот се планира да се започне со изработка на неопходната урбанистичко-планска документација, поддршка на процесот на легализација на објектите на ромските домаќинства, почеток на активностите во рамки на фондот за итни мерки за подобрување на хигиенските и здравствените услови за живеење на ромската популација, почеток на програмата „Школо после школо“ за поддршка на тековните програми за формално и неформално образование, и други активности за кои наскоро подетално ќе биде запознаена пошироката јавност, -соопштуваат од Општина Прилеп.
Проектот е финансиран од фондовите на ЕУ, како дел од „ИПА 2“ програмата и е поддржан од Владата на Република Северна Македонија.Лидер на проектот е италијанската граѓанска организација, додека „Рома Перспектив“ од Прилеп е асоцијативен партнер на проектот.
