-Фокусирано работиме на економскиот развој затоа што ни е важен економскиот стандард на граѓаните. Во таа насока веруваме дека НАТО членството е охрабрување и за инвеститорите и од Обединетото Кралство и од другите земји членки, да инвестираат тука. Во тек се и реформите во правосудството, со коишто очекуваме ефикасност и транспарентност во областа, што е важно за европските перспективи на државата, но и за граѓаните и инвеститорите, изјавил премиерот Зоран Заев на денешната средба со британската амбасадорка Рејчел Галовеј.
Како што соопшти прес службата на Владата, на средбата е акцентирана заедничка определба за зголемување на економската соработка, иако Обединетото Кралство и денес е еден од најголемите странски директни инвеститори во земјава.
Премиерот Заев и британската амбасадорка Галовеј го поздравиле интензивирањето на соработката помеѓу двете држави, дури и за време на пандемијата. Изразено е очекување за уште поактивно унапредување на соработката во сите области, по потпишаната спогодба за партнерство, трговија и соработка меѓу двете земји. Оценето е дека се создадени можности за проширување на билатералните односи во сите области. Како пример за добрата соработка е посочено обостраното признавање на возачките дозволи, за што формалните процедури се во фаза на заокружување, соопштуваат од прес службата на Владата.