Против двајца доктори од Битола и една докторка од Белград, полицијата до битолското Обвинителство поднесе кривични пријави. Прво осомничениот М.В. (33) и второ осомничениот Г.Ч. (60), ги товари за кривично дело „злоупотреба на службена положба и овластување. Првиот доктор се сомничи и за кривично дело „фалсификување службена исправа“.
Сопругата на прво осомничениот доктор, А.В. (33) од Белград, е осомничена исто така за две кривични дела: „надрилекарство“ и „непостапување според здравствените прописи за време на епидемија“.
Како што соопшти МВР, двајцата доктори гинеколози во ЈЗУ Клиничка болница – Битола, ги пречекориле своите овластувања, овозможувајќи и на сопругата на првоосомничениот доктор, да оперира, иако немала лиценца за работа, издадена од Лекарската комора на РСМ. А.В. на први јануари годинава, породила жена со царски рез, во операциона сала на битолската гинеколошка клиника.
Нејзиниот сопруг, гинеколог во оперативниот дневник внел невистинити податоци.
-Во графата податоци за оператор, ги внел своите податоци и податоците на второпријавениот, а од стариот оперативен дневник отстранил страници на кои третопријавената ги запишала извршените оперативни интервенции на 01.01.2021 година., соопшти МВР.
