Преку 200 милиони евра инвестиции само во патната инфраструктура се планираат годинава во Министерството за транспорт и врски. Во тие рамки продолжува изградбата на пругата кон Бугарија, проектот за гасификација, како и бројни други нови проекти во комуналната инфраструктура. Министерот за транспорт и врски, Благој Бочварски, најави долга и интензивна градежна сезона. Тој со заменик министерот за транспорт и врски Беким Реџепи и директорот на ЈП за државни патишта, Ејуп Рустеми денеска извршија увид врз градежните активности за реконструкција на мост на регионалниот пат Куманово-Свети Николе.
-Слободно можеме да заклучиме дека во градежништвото заедно со сетот економски мерки што ги донесе Владата, успеавме да го амортизираме големото влијание од здравственета криза и како резултат на тоа, успеавме да ги зачуваме работните места во градежните компании. Ни претстои долга градежна сезона каде инвестициите во инфраструктурата дополнително ќе ги засилиме. Продолжуваме со изградба на автопатите и експресните патишта, со 25 нови проекти во комуналната инфраструктура, со изградба на магистралните гасоводи, а со стартот на градежната сезона започнуваме со рехабилитација на локалните улици и патишта, согласно динамиката предвидена со завршените тендерски постапки” изјави министерот Бочварски.
Како што рече, објавена е тендерската постапка за изградба на пругата во двете фази од Куманово до Крива Паланка, за што во наредниот период се очекува да се избере изведувач за градежните работи.Во однос на реконструкција на мостот, министерот Бочварски истакна дека ова е инвестција со која ќе се подобри безбедноста во сообраќајот.
Директорот на ЈП за државни патишта Ејуп Рустеми, истакна дека реконструкција на мостот е значајна инвестиција која се реализира после педесет години.
-Јавното претпријатие за државни патишта од својот буџет издвои 1,9 милиони евра и минатата година на почетокот на јуни започна со санација на мостот. Досега комплетно се санирани 4 средни столба, а на 3 столба во моментов се врши санација. Паралелно се работи на зајакнување на двата главни и попречните челични носачи, се врши таканаречено пескарење на носачите,зајакнување на одредени делови и нивна антикорозивна заштита, изјави Рустеми.
Досега,преку ЈП за државни патишта, изградени и рехабилитирани се вкупно 11 мостови на државни патишта, а во овој момент активно се работи на три мостовски конструкции.
