Службата за Трансфузиологија во Прилеп и натаму интензивно е вклучена во борбата против пандемијата предизвикана од „Корона вирусот“. Граѓаните кои што имаат доволно антитела по добиената борба со „Ковид-19“, и кои што ги исполнуваат сите предуслови, доброволно даруваат крв за конвалесцентна плазма која што им помага на другите заболени со тешка клиничка слика. Во последните 48 часа во службата во Прилеп, земена им е крв за конвалесцентна плазма на седуммина сограѓани: Тошко Перушески, Игор и Виолета Грашкоски, Никола Талевски, Филип Петрески, Ѓорѓи Китаноски и Рубин Кузманоски.
-Хероите на денот се доброволните дарители на крв за конвалесцентна плазма. Тие се хумани меѓу најхуманите. Во услови на пандемија, сите порачаа во 2021 г. да биде крај на пандемијата со „Ковид -19“. Поклон до земја и големо БЛАГОДАРАМ,- напиша на својот Фејсбук профил, началничката на Службата за Трансфузиологија во Прилеп, д-р Виолета Јованоска.
Според министерот за здравство, Венко Филипче, досега околу над 660 пациенти се третирани со крвна плазма, а обезбедени се над 800 единици од околу 730 донори.
-Дарувањето конвалесцентна плазма е највисокиот чин на хуманост. Оздравените пациенти имаат можност да им помогнат на оние пациенти, кои во моментов се борат со „КОВИД-19“. Да бидеме солидарни и грижливи, да спасиме човечки животи,-порачува министерот Филипче.
За да крв за конвалесцентна плазма граѓанинот мора да исполни повеќе услови, кои се објавени на овој линк на сајтот на Институтот за трансфузиона медицина на Република Северна Македонија.
А, Службата во Прилеп, организира постојано и крводарителски акции. Пред една недела во крводарителката акција што се реализираше во хотелот „Кристал Палас“ во Прилеп, беа собрани 55 кеси со драгоцена течност.
