Денеска е Интернационалниот ден на прегратките! Се одбележува од 1986 година, кога свештеникот Кевин Заборни од Клио, Мичиген го прогласил за меѓународен ден, бидејќи констатирал дека прегрнувањата будат чувства на среќа, радост, сигурност кај луѓето. Оттогаш овој ден се одбележува во многу земји.
Тврдењето на Заборни низ годините го потврдиле низ истражувања многу научници – психолози и психијатри, препорачувајќи искрени и топли прегратки со пријателите и блиските, како практики за размена на позитивна енергија, будење на креативноста и чувства на задоволство, сигурност и среќа кои што го разубавуваат секојдневието на секој човек.
Пандемијата на „Ковид-19“ потврдува дека е така. Зашто најголем број граѓани се чувствуваат целосно хендикепирани, бидејќи чувствата на радост и среќа, не може да ги поделат низ прегратки со своите, ниту пак со искрена и топла прегратка да им изразат емпатија и да ги утешат блиските кои се соочуваат со таги и несреќи.
Денес кога сите, со нетрпение го чекаме крајот на „Ковид-19“, за да може повторно да уживаме во прегратките на саканите роднини и пријатели, да се прегрнеме со мислите, да разменеме убавини! А, оваа фотографија на уметничкото дело на австрискиот сликар Густав Климт „Бакнеж“, нека биде нашиот вирутелен бакнеж и прегратка до сите вас, како израз на искрено пријателство, полно со надежи и верба, дека годинава не чекаат многу подобри денови во постковид иднина!
фото: Википедиа
