Новоименуваниот директор на Царинска Управа на Република Северна Македонија, Горан Сугарески веднаш со преземање на работните обврски од својот претходник, ексдиректорот Ѓоко Танасоски почна со реализација на својата агенда. Денеска тој ќе се сретне со заменик претседателот на Владата за борба против корупција и криминал, одржлив развој и човечки ресурси, Љупчо Николовски и претставници од амбасадата на Обединетото Кралство во Република Северна Македонија.
Сугарески од преземање на фунцијата, со почеток на оваа работна недела оствари бројни работни средби со цел што подобра организација на управата.
-И во новиот професионален предизвик продолжувам чесно, посветено и транспарентно да служам на интересите на граѓаните и државата. Ќе сторам се’ да ја оправдам укажаната доверба. Упатувам благодарност на досегашниот директор за неговиот ангажман во Царинската Управа. Можеме уште повеќе и уште подобро! Нови професионални успеси за подобра иднина, напиша на својата Фејсбук фан страница, Сугарески.
Сугарески по професија е дипломиран правник, магистер по политички науки, со богато работно искуство зад себе. Во претходниот владин состав многу успешно ја извршуваше функцијата, министер за транспорт и врски. А, кариерата ја почнува од Општина Прилеп, каде на почеток работеше како комунален инспектор. Тој беше репрезент на СДСМ, од 2000 до 2003 година, тој беше советник во Советот на Општина Прилеп, а од 2008 до 2017 година беше пратеник во Собранието на Република Македонија. Во текот на пратеничкиот мандат покрај бројните обврски во повеќе комисии, беше член на парламентарната делегација за соработка со НАТО. Од 2013 до 2016 г. беше заменик координатор, а потоа и координатор на пратеничката група на СДСМ.
